BOAC, Marinduque — Hinirang bilang bagong pangulo ng Panlalawigang Pederasyon ng Sangguniang Kabataan sa Marinduque si Bertinus Valencia kung saan siya ay nakatakdang umupo bilang ex-officio member ng 16th Sangguniang Panlalawigan.

Bago mahalal bilang lider ng panlalawigang pederasyon, nanalo si Valencia na SK chairperson ng bayan ng Torrijos noong nakaraang Barangay at Sangguniang Kabataan Elections.

Siya ay kasalukuyang first year student sa Marinduque State College at kumukuha ng kursong Bachelor of Arts in Political Science. Nakumpleto naman n’ya ang sekondarya sa Our Mother of Perpetual Succor Academy taong 2022.

“Nagpapasalamat po ako sapagkat nabigyan ako ng oportunidad na paglingkuran ang ating lalawigan kaya sasamantalahin ko po ang pagkakataon na magampanan ang mga responsibilidad na kaakibat ng aking posisyon at patuloy na magiging boses ng mga kabataan dito sa ating probinsya,” wika ni Valencia.

Siniguro rin ng SK provincial federation president na susuportahan nito ang mga programa at proyekto ng kasalukuyang administrasyon lalo’t higit ang pagpapaunlad sa aktibong pakikilahok ng mga kabataan. Tututukan din umano n’ya ang mga usaping may kaugnayan sa teenage pregnancy, mental health awareness ng mga estudyante at mga gawain sa pangangalaga ng inang kalikasan.

Samantala, kabilang sa bagong ‘set of officers’ sina Mark Jhun Zoleta-bise presidente, Khyn Harold Grave-secretary, Napoleon Largado III-treasurer, John Mark Jayag-auditor at Jhustin Rodil bilang public relations officer. — Marinduquenews.com

Related Post

error: Content is protected !!