Nakipagpulong ang ilang mga opisyales ng lalawigan at simbahan kay Department of Environment and Natural Resources (DENR) Secretary Gina Lopez nitong Biyernes, Disyembre 2. Kabilang sa mga dumalo sa nasabing pagpupulong ay sina Bokal John Pelaez, Primo Pamintuan, Rey Salvacion at Boac mayor Roberto Madla. Kasama ring dumalo ang obispo ng lalawigan na si Bishop Marcelino Antonio Maralit, Fr. Arvin Madla, dating bokal Adeline Angeles at ilang mga opisyal ng Marinduque Council for Environmental Concerns (MACEC).
Ayon sa Facebook post ni Bokal John Pelaez, isa sa mga napag-usapan ay ang pagsasaayos ng Marcopper pit upang ito ay maging isang eco-tourism na lugar.