BOAC, Marinduque — Isang kasunduan ang nilagdaan ng National Nutrition Council (NNC)-Mimaropa at ng Bahi Agriculture and Fisheries Association (BAFA) para sa Tutok Kainan dietary supplementation program na naganap sa DAR Provincial Office kamakailan.
Ang programang Tutok Kainan ay bahagi ng Philippine Plan of Action for National Nutrition Supplementation Program 2017-2022.
Layon nito na maiwasan ang malnutrisyon sa pamamagitan ng pagpapahusay sa kalidad at dami ng paggamit ng pagkain para sa mga “nutritionally at-risk” na mga buntis at mga bata na may edad na anim na buwan hanggang dalawang taong gulang.
BASAHIN: Farm Business School, inilunsad sa bayan ng Boac
Bukod dito, napili ang BAFA bilang supplier ng mga pagkain na ibibigay sa mapipiling benepisyaryo.
Nagpahayag naman si Gov. Presbitero J. Velasco ng kanyang taos-pusong suporta sa nasabing programa.
Dinaluhan ang virtual na seremonya nina Atty. Marvin Bernal, regional director ng Department of Agrarian Reform (DAR) sa Mimaropa, OIC-Regional Nutrition Program Coordinator Ma. Eileen Blanco.
Kasama rin sa dumalo sina Provincial Nutrition Officer Rubi Apiag, Provincial Nutrition Focal Person Francis Erik Bacena ng NNC-Mimaropa at OIC-CARPO ng DAR Provincial Officer na si Engr. Anton Llanes.
Naroroon din ang ilang mga kawani at opisyales ng DAR at PNO sa nabanggit aktibidad. — Marinduquenews.com
