ODIONGAN, Romblon – Sorpresang binisita ni Marinduque Representative at House Energy Committee Chairman Lord Allan Jay Velasco ang solar power plant ng Sunwest Water & Electric Company (SUWECO) sa Barangay Tumingad, Odiongan, Romblon nitong Sabado, Agosto 3.
Ayon kay Dennis Alag, ISD Manager ng Tablas Island Electric Cooperative, kasama ni Velasco sina Sunwest Group Chairman Zaldy Co at Marinduque Electric Cooperative General Manager Gaudencio Sol, Jr.
Nais umano ni Velasco na alamin ang sitwasyon ng kuryente sa Tablas Island, gayundin upang magkaroon ito ng ideya sa pagpapatakbo ng ‘electric cooperative’ sa nasabing isla.
Sinabi naman ni Alag na natuwa si Velasco sa kanyang pagbisita dahil ang Tablas ang may pinakamalaking micro-grid system sa mga Small Power Utilities Group (SPUG) areas sa Pilipinas, kung saan maganda ang kasunduan ng Diesel Plant at Solar Power Plant para mag-suplay ng kuryente sa Tablas.
Ang SUWECO Solar Power Plant ang nagbibigay ng kuryente na ipinamamahagi ng Tablas Island Electric Cooperative (TIELCO) sa buong Tablas Island sa lalawigan ng Romblon. – This story was first published on Romblon News, a local news partner of Marinduquenews.com